Møre og Romsdal skal vere eit føregangsfylke på samarbeid

Fylkeskommunen fekk i regionreforma styrka si samordnings- og samfunnsutviklarrolle. Dette viser seg att i auka tal nettverkssamlingar, konferansar, kurs og webinar som fylkeskommunen har lagt til rette for. Fleire av desse er gjennomført i samarbeid med andre aktørar i fylket. Eksempel på tema er berekraft, planlegging, klima og miljø, folkehelse, kulturtilbod, trafikktrygging, integrering, førebyggande tannhelsearbeid og digitalisering. Tilsette i kommunane er ei viktig målgruppe for mange av desse kompetanse- og delingsarenaene.

Fylkeskommunen og statsforvaltaren si satsing Møre og Romsdal 2025 kan no vise til gode resultat for regionalt samarbeid og samordning. I 2022 er det gjennomført både felles møteplassar og prosjekt. Gjennom internasjonalt samarbeid har vi arbeidd på tvers av landegrensene for å skape meirverdi og kompetanse som fremmar vår regionale utvikling. Dette har vi gjort gjennom deltaking i europeiske nettverk, interesseorganisasjonar, prosjekt og utvekslingar.

I ein situasjon der demokratiet blir opplevd å vere under press, vil vi framheve arbeidet fylkeskommunen har gjort for å ivareta det regionale demokratiet, legge til rette for regionale politiske prioriteringar, medverknad og opplyst debatt.

• Programmet Møre og Romsdal 2025 (MR2025) arrangerte Nyttårskonferansen med toppleiarar frå alle tre forvaltningsnivåa i Møre og Romsdal. Sjå eigen rapport frå programmet.
• E-læringskurs om berekraft er utvikla og lansert internt i fylkeskommunen og eksternt for alle interesserte.
• Det er laga ein artikkelserie knytt til satsingsområda i Berekraftfylket
• Det er gjennomført webinar om sirkulære anskaffingar med brei deltaking frå kommunane i fylket og andre offentlege verksemder.
• I samarbeid med Kristiansund kommune og United Cities er United Cities Internship Program etablert på Campus Kristiansund.
• Arbeidet med å fornye det regionale planverket i tråd med berekraftsmåla og regional planstrategi heldt fram i 2022. Fem fylkesstrategiar vart vedtatt, og to er under arbeid. Sjå eigen rapport til fylkesutvalet (sak U-9/23).
• Fylkeskommunen har følgt opp omsynet til berekraftig samfunnsutvikling i våre uttalar til kommunale plansaker. Det er gitt samordna uttale til 1 140 plansaker, der søknader om dispensasjon frå kommuneplan og reguleringsplan utgjorde 840. Det er reist motsegn til 38 saker, åtte fleire enn i 2021.
• I samarbeid med Statsforvaltaren vart det arrangert ein plan- og klimakonferanse for kommunane i oktober.
• Samen med Statsforvaltaren arrangerte fylkeskommunen i mai eit webinar om klimabudsjett for kommunane.
• Fylkeskommunen var i juni med å arrangere Miljøkonferansen Midt-Norge i samarbeid med Sunndal næringsforening, Sunndal Sparebank og Suns.
• Saman med Statsforvaltaren er det jamleg sendt ut nyheitsbrev til planleggarar i kommunane
• Samferdselsområdet har i løpet av 2022 gjennomført møte med ei rekke ulike aktørar – mellom anna med andre fylkeskommunar, kommunar, departement, ulike statlege etatar, forskingsinstitusjonar og andre organisasjonar, leverandørar og entreprenørar. Eksempel på dette er informasjons- og medverknadsmøter arrangert av KS og ulike departement om til dømes inntektssystemet for fylkeskommunane og Nasjonal transportplan.
• Samferdselsområdet er fast deltakar i ei rekke forum med andre fylkeskommunar, som Vestlandsrådet, samarbeidsforum for samferdsel mellom Møre og Romsdal og Trøndelag og Jernbaneforum for Dovre- og Raumabanen.
• Fylkesvegavdelinga har vurdert trafikksikkerheit i alle saker på offentleg ettersyn og dispensasjonssaker på høyring. I tillegg er det sent ut 2 500 brev knytt til forvaltning av vegnettet og som svar på førespurnadar frå publikum.
• Fylkeskommunen arrangerte i 2022 konferansen «Kommunal Trafikksikkerhet – fra A til Å» i samarbeid med Trygg Trafikk.
• Det er gjennomført ei rekke tiltak innanfor haldningsskapande trafikktryggingsarbeid retta mot barn, ungdom, syklistar og fotgjengarar i samarbeid med kommunar, Trygg Trafikk og politiet.
• Fire folkebibliotek i fylket deltok i prosjektet «Bibliotek og berekraft i Møre og Romsdal», og jobba meir strategisk med FN17.
• Kulturavdelinga arrangerte saman med Kulturtanken Kulturtankens årskonferanse i Kristiansund, dette var første gong årskonferansen vart arrangert utanfor Oslo.
• Det er gjennomført FrivilligFORUM der fylkeskommunen samlar frivillige organisasjonar og kommunalt tilsette
• Kommunane, næringsliv og frivillige har blitt invitert inn i feiringa av frivilligheitas år 2022 med deltaking på samlingar/konferansar og tilskot til aktivitet.
• Fylkeskommunen har samarbeidd med Statsforvaltaren, frivilligheita og Møre og Romsdal idrettskrets i Folkehelseforum. Her blir ulike tema rundt folkehelse løfta opp og det genererer samarbeid rundt konferansar, samlingar og kunnskapsinnhenting.
• NAV Møre og Romsdal, fylkeskommunen og næringsliv samarbeider om å finne nye tiltak som hindrar utanforskap i prosjektet “Nye muligheter for digitale talenter”.
• Saman med Molde kommune vart Molde bærekrafthub AS stifta med formål å bidra til å utvikle byggebransjen i ei meir berekraftig retning.

• Plan for kvalifisering av innvandrarar er vedtatt.
• Fylkeskommunen har anbefalt busetting av flyktningar til Integrerings- og mangfoldsdirektoratet etter samhandling med kommunane. Sjå rapport lagt fram for fylkesutvalet om status for integreringsarbeidet i fylket (sak U-3/23)
• Gjennom partnarskapsavtalar med kommunane (hoppid.no) er det gjennomført webinar med tema entreprenørskap for innvandrarar.
• Gründertenesta hoppid.no og Ålesund Kunnskapspark har gjennomført intensivkurs for innvandrarar som ønsker å starte eiga bedrift.
• Det er gitt tilskot til 16 organisasjonar registrert i frivilligregisteret frå ordninga integreringstilskot for flyktningar. Ordninga vil fortsette i 2023.
• Nordlandsforskning gjennomførte på oppdrag frå Møre og Romsdal 2025 ei kartlegging av ungt utanforskap i Møre og Romsdal som grunnlag for det vidare samarbeidet i offentleg sektor. Rapporten frå prosjektet kan du lese her.
• MR2025 oppretta samarbeid med KS’ Partnarskap for radikal innovasjon og kommunale og regionale aktørar om ei brei satsing for å motverke ungt utanforskap.
• I regi av Møre og Romsdal 2025 er det gjennomført fire samlingar i Levekårsnettverket ..
• Tannhelsepersonell utførte 2 543 timar førebyggande arbeid utanfor klinikkane i 2022 og nådde med det måltalet om 2 500 timar.
• Tannhelsepersonellet sin besøksfrekvens på helseinstitusjonane for den eldste pasientgruppa nærma seg i 2022 måltala, etter eit par år med koronapandemi og besøksrestriksjonar. Dette bidreg til kunnskapsdeling og kompetansebygging hos kommunalt pleie- og omorgspersonell om bebuarane si munnhelse.
• Eldrerådet og rådet for personar med nedsett funksjonsevne i fylkeskommunen gjennomførte kvar si samling for tilsvarande kommunale råd i fylket.
• I ordninga med den kulturelle spaserstokken samarbeider fleire kommunar om produksjonar av høg kvalitet til eldre, og samordnar tilbodet mellom kultur,- helse- og frivilligsektoren.
• Fylkeskommunen arrangerte i samarbeid med Kultur- og likestillingsdepartementet eit innspelsmøte den 20. oktober knytt til spelemidelordninga for anlegg for idrett og fysisk aktivitet. Målet er å få til ei innretting av ordninga som gjer at vi får flest og best mogleg anlegg.
• I Folkehelseprogrammet er det arbeidd med ei langsiktig styrking av kommunane sitt arbeid med å fremme befolkninga si helse og livskvalitet. Barn og unge, psykisk helse og rusførebygging er sentrale tema.

• Fylkeskommunen har fått innvilga tre nye EU-prosjekt der fylkeskommunen står som partnar: Distance LAB, BSI_4Women og PROACTsme. Fellesnemnaren for prosjekta er entreprenørskap og digitalisering. Prosjekta startar opp i 2023.
• Handlingsplan for 2022 for EU-nettverk er gjennomført, og det er vedtatt ny Fylkesstrategi for internasjonalt samarbeid.
• Fylkeskommunen vart valt som deltakar i EU-prosjektet Circular Cities and Regions Initiative (CCRI) saman med 36 andre europeiske byar, regionar og klynge
• Ungdomspanelet har gjennomført prosjekt om ungdomsmedverknad (Erasmus +) saman med ungdom frå Polen.Les nyheitssak om Erasmus+-prosjektet på mrfylke.no
• I september deltok ungdomspanelet på den første felleskonferansen for fylkeskommunale ungdomsråd i Noreg på Gardemoen, finansiert av Erasmus +.
• To representantar frå ungdomspanelet deltok på den andre samlinga til «North Sea Youth Conference» i Brugge i Belgia.
• Prosjektet «CREST», der Møre og Romsdal fylkeskommune samarbeider med partnarar i Frankrike og Polen om visualisering av klimaendringar i kystbyar, starta opp i 2022.
• Samferdselsområdet deltek inn i forskingsprosjekt med internasjonale partnarar, til dømes prosjektet ZEVS (enabling Zero Emission passenger Vessel Services), som søker å etablere eit kunnskapsgrunnlag for å hjelpe myndigheiter med å ta avgjersler i innfasinga av grøne båtsamband.
• Fylkeskommunen deltok i interesseorganisasjonane Nordsjøkommisjonen og organisasjonen for europeiske kystregionar CPMR. Samferdselsområdet deltek i Nordsjøkommisjonen si arbeidsgruppe for transportgruppe, og næringsområdet deltek i arbeidsgruppa for marine ressursar.
• I Prosjektet Capital of Dacia – Living museum of European Cultural Heritage, med varigheit 2022-2024, har Møre og Romsdal fylkeskommune i samarbeid med Hunedoara fylke i Romania arrangert eit arbeidsseminar med tema «Presenting and/or preserving the monuments» og «Implementing technology in museum and in the field».

• Fylkeskommunen legg store ressursar i å legge til rette for at politiske møte skal kunne gjennomførast på best mogleg måte og vere offentleg tilgjengeleg. Sjå meir under Politikk i årsrapporten (lenke)
• Fylkeskommunen legg til rette for at dokumenta til fylkeskommunen er offentleg tilgjengelege i samsvar med gjeldande reglar og at alle dokument på mrfylke.no skal møte krava til universell utforming.
• Fylkeskommunen varetek rettstryggleik og har kompetanse innan kontraktsrett, utdanningsrett, arbeidsrett, eigedoms- og entrepriserett, saker etter veglova, offentlege anskaffinga og kommunal og forvaltningsrett.
• Som grunnlag til samfunnsdebatten og avgjerder i fylkeskommunen og kommunen er det utarbeidd fylkesstatistikk og kommunestatistikk, sistnemnde i nytt digitalt design
• Det er gjennomført Ungdommens fylkesting i november og åtte samlingar i ungdomspanelet, sjå eigen årsrapport frå ungdomspanelet på www.mrfylke.no/up
• Det er gjennomført to regionale dialogmøte om ung medverknad for barn- og unges representant, dei som jobbar med ungdomsråda i kommunane og leiar i ungdomsråda.
• Fylkeskommunen har gitt råd og innspel om medverkingsprosessar i kommunale plansaker
• Fylkeskommunen har gjennomført kurs i universell utforming av dokument for kommunalt og fylkeskommunalt tilsette
• Fagavdelingane har involvert dei fylkeskommunale råda i til saman 37 saker gjennom året, inkludert økonomiplan med handlingsprogram og fleire fylkesstrategiar.
• Fylkeskommunen har tatt i bruk ny modell for medverknad med kommunar og den vidaregåande skolen i arbeidet med Den kulturelle skolesekken.
• Fylkeskommunen arrangerte ei samling i samarbeid med Tverga (Ressurssenter for egenorganisert idrett og fysisk aktivitet) med mål om få til meir medverknad i anleggsprosessar for anlegg for idrett og fysisk aktivitet.
• UFA (ungdommen sine fylkesarrangørar i UKM) er 13 engasjerte unge frivillige mellom 15 og 20 år. Dei var essensielle i all planlegging av fylkesfestival i UKM, og for gjennomføring av sjølve festivalen.