Selskapet MMC First Process fekk tildelt prisen Årets bedrift 2022 under fylkestinget i april. Selskapet leverer utstyr til handtering, prosessering og kjøling av sjømat og er verdsleiande på området. I følgje juryen har selskapet ei sterk rolle i regional næringsutvikling og er ei drivkraft for innovasjon og nyetablering. Under utdelinga sa selskapet at heideren er ei stor anerkjenning av jobben som dei tilsette gjer.

Jazzlogen fekk fylkeskulturprisen for 2023. Prisvinnarane har gjort ein solid innsats for å rekruttere unge musikarar frå heile fylket. Jazzlogen er eit samarbeidsprosjekt mellom Molde Janitsjar, Ytre Suløens Jass-ensemble og Moldejazz.
Jazzlogen er også viktig for Molde internasjonale jazzfestival, og eit flott tilskot til paraden som går gjennom byen kvar dag gjennom festivalen, sa Jessica Gärtner, leiar i kultur- og folkehelseutvalet under utdelinga. Sjå film frå utdelinga under fylkestinget i desember

Hogstein Agro ved Odd Christian Stenerud frå Giske vart tildelt miljøprisen i Møre og Romsdal. Stenerud og verksemda hans får prisen for å ha utvikla eit produkt som er basert på avfall frå fiskerinæringa, og som reduserer behovet for kunstgjødsel i landbruket.

– Eg trur dette vil bety mykje for mange bønder når dei oppdagar både moglegheita til å spare 40 prosent av kostnadane, og at klimaavtrykket blir redusert med 80 prosent, sa Stenerud under utdelinga.

Du kan sjå intervju med prisvinnaren under utdelinga i desember

Organisasjonen JoinUs har fått årets inkludering- og mangfaldspris frå Møre og Romsdal fylkeskommune. Prisen går kvart år til nokon som har tatt initiativ til, eller har gjennomført tiltak som fremmer like moglegheiter, meir inkludering og mangfald i samfunns- og arbeidsliv i Møre og Romsdal. JoinUs har berre halde på i to år.

– På den tida har dei blitt ein stor aktør for integrering i Romsdalsregionen, og gir både aktivitet, samhald og meiningsfulle kvardagar for sine deltakarar, sa leiar av kultur-, næring- og folkehelseutvalet, Marit Nerås Krogsæter då ho delte ut prisen.

Anikken Haukeberg frå Skodje vart kåra til årers lærling for 2023. Etter yrkesopplæring ved Ålesund vgs, var Anniken lærling i yrkessjåførfaget hos SR Group i Kristiansund. Både lærebedrift og prøvenemnda nominerte Anniken til årets lærling, og i konkurranse med mange andre dyktige lærlingar, var det ho som stakk med den gjeve prisen.

I følge lærebedrifta har Anniken vore uredd, nysgjerrig og open for nye utfordringar. Ho har vist stor evne til å opptre profesjonelt, og har alltid vore imøtekommande og engasjert i jobben. Du kan lese meir om årets lærling på mrfylke.no

Kristiansund og Nordmøre Næringsforum, Molde Næringsforum og Næringsforeningen Ålesundregionen er «Årets regionbyggar 2022». Dei fekk skryt for samarbeidet i fylket.

- Tusen takk for at juryen løftar fram eit næringslivssamarbeid til «Årets regionbyggar». Det set vi utruleg stor pris på, sa dagleg leiar Britt Flo i Molde Næringsforum då ho takka for prisen.

Nyttårskonferansen deler kvart år ut prisen Årets regionbyggar til ein person, organisasjon, bedrift eller offentleg aktør som har utmerka seg på ei enkeltsak eller over tid som ei samlande kraft i fylket - eller har tatt spesielt initiativ som bygger Møre og Romsdal saman.